睇開韓劇嘅史友唔知有無留意一點，就係佢哋啲古裝劇入面，犯咗事嘅女角通常都會帶張草席，跪喺上面請罪，呢種行為就叫做「席藁（音稿）待罪」。請罪就請罪喇，點解仲要鋪張草席呢？據講係因為古代行刑嗰陣會搞到成地血，鋪張席方便清理。亦有人話係因為囚犯死咗嘅話，用草席一捲就處理咗。當然，席藁待罪並唔係韓國專利，宋朝大文豪蘇東坡喺《上神宗皇帝書》就提過「席槁」一詞，話自己得罪咗皇上，會跪响草席上靜候刑罰。
唔單止犯人會席藁待罪，連明朝孝宗皇后張氏都曾經歷過。話說明孝宗獨寵張氏一人，張氏家族因而盛寵不衰，借住皇后嘅勢力、孝宗嘅縱容喺朝中為非作歹。孝宗駕崩之後，阿仔武宗繼位無耐就過身，由於明武宗無子，張太后改立武宗嘅堂細佬登基，成為世宗。
世宗由於係過繼俾明孝宗帝后，理應改稱親生父母做叔嬸，但世宗唔理咁多，先後立自己嘅生母、祖母為太后同皇太后，搞到同張太后嘅關係漸漸疏離，張太后嘅稱號亦由「聖母」變成「伯母」，掀起大禮議之爭。後嚟張太后細佬張延齡同張鶴齡因罪入獄，當時差唔多70歲嘅張太后就席藁待罪，為細佬求情，但明世宗都唔理佢。最後張鶴齡喺獄中餓死，張太后隔幾年之後過身，明世宗有咩反應？下令處死剩低嘅張延齡，一了百了。
圖為張太后像同劇照，原圖嚟自網絡。